這篇文章講一个主題，但是牽涉著兩个觀念：網路佮酸民，咱來先講網路。
這馬逐家日常所講的網路，其實是無蓋明確的名詞，因為咱早前是用語音網路敲電話，這馬是用數據網路通話，數據網路原來是設計予電腦通訊用的，因此，叫做電腦網路顛倒佮適合。下面就簡單說明電腦佮網路這兩个觀念。
咱共1946年叫做電子計算機元年，因為第一部純電子零件做成的電腦佇彼年問世，經過1960年代的大型電腦、1970年代的迷你型電腦/工作站、到1980年代的個人電腦，短短無到半世紀，電腦就共整個世界反一輪，這馬逐家上班的第一件代誌就是開電腦，可見電腦科技帶來的改變有偌大。毋過，一直到網路出現進前，電腦攏若親像一个孤單老人仝款，真無伴。
1950-1960年間是區域網路的發展年代，散落佇無仝樓層的電腦終於袂閣孤單，會當透過區域網路來互相溝通。1969年第一代網際網路(抑叫做互聯網)出現，共四个區域網路連做伙，遠在天邊的電腦之間也終於會當連通。此後網際網路快速發展，到1990年代已經成功連通全球的私人網路、公眾網路、學術網路、商業網路佮政府網路。咱這馬所講的網路，其實只是網際網路的簡稱。彼時陣，網路主要咧提供通訊的功能，但是透過全球連通做伙的電腦群，也間接擴大了電腦的解題能力。
1990年代，第一代全球資訊網出現，資料免閣受限佇個別的電腦，而是透過連結(link)技術貯佇一群電腦頂，也就是講共整個網路所貯的資料連結起來，做成一個虛擬的圖書館，毋過，欲善用這个資源，著愛會記得做為進入點(entry point)的網站地址才會使，不幸的是，彼的網路地址是有夠歹記的。這個無親切的束縛，愛到1998年谷歌網路搜揣系統問世後，才真正解放。咱這馬無必要閣去記網站的地址，只要拍入有關係的字詞，谷歌大神就會真神奇去揣出所有相關的網站，甚至直接連到正確的網站去，一个無國界的美麗新世界就按呢形成，天涯若佇隔壁的理想終於實現。對人類來講，這个新世界代表的是更加利便來進行日常的生活活動，比如全球各地的通訊(電話、傳Line)、利便的資訊處理(發表、搜揣或是傳播資料)、或者是一站式的商品買賣。想看覓，幾十年毋捌見面的好朋友，突然間共美國密西根州的初春美景傳到Line頂頭，是偌爾溫暖。2008年，雲端科技的出現予這个新世界更加若猛虎添翼，網路變做是囥資料上重要的所在，咱也毋免閣需要知影或是煩惱資料囥佇網路頂的佗一个電腦。
頂懸這段短短的歷史，只是欲予咱了解這个美麗新世界毋是家己對天頂落落來的，而是人類經過真濟年的努力才得著的，咱這馬會當遮利便佇這的虛擬世界交朋友、做智識交換、心靈交流，實在真無簡單，實在需要好好仔珍惜才對。
網路酸民講的是一群網路朋友，佇網路頂頭踅街，只要看著無順眼的，比如政治、宗教、或種族觀點無仝，就開始攻擊：用話仝酸，仝剾洗、仝侮辱、仝姦撟，甚至貼標記、鼓吹仇恨，愈毋是款的，才毋管你的言論主題抑資料佮政治完全無關係，就是欲共你安上政治陰謀，殘殘共你修理一下。這佇社交軟體出現佮謠言農場(專門生產謠言的網站)的推捒下，更加是氾濫不堪。
其實，網路酸民的現象，佮網路並無有一定關係，是人性使然，因為日常生活上本來就充滿了酸民的形影，比如看著別人藍綠攏吃會開，就罵人無恥、無骨頭；見著別人提較濟政府的計畫，就罵人御用學者；講好嫁娶的男女，一拄著宗教信仰，雙方家族就堅持家己才是正宗、罵人是外道；足好的朋友，一講著政治，就堅持家己才是好人、別人攏是歹人。網路的出現，只是予酸民的行為更加激烈、言詞更加劇烈、霸凌閣較雄死爾爾。也就是講，酸民的「再進化」變成網路酸民，對網路的特性來看，檢采是必然的。上主要的原因，因為網路的虛擬性提供了隱匿的效果，網路酸民袂閣帶念見面三分情的人際壓力，愈敢發聲；第二个原因，網路頂永遠袂孤單，真簡單就會吸引出串聯的效果：一人開始酸，仝溫層就靠過來，互相燃柴添火著，變甲愈袂收山。這兩種原因又閣互相聲援、互相相楗，網路酸民的現象就愈無法度避免矣。
既然網路酸民佮現實世界的酸民無啥無仝，離袂開人性的折磨，講欲共這个現象消除是無啥實際的，對教育的角度來看，美麗新世界的出現，雖然惡化了酸民的現象，卻也提供一屑仔解決的貓霧光。
首先，上捷看見的網路酸民的類型，是因為現實生活的不如意所引起，比如學業不如意、事業不如意、情感不如意、健康不如意等等，遮的不如意長時間無法度解決所產生的慒心感，就會共人硩出憤世的念頭，需要透過哭呻社會濟濟現象的不滿，來敨放憤怒。上便宜的敨放管道之一，就是網路的虛擬世界，佇這个匿名的世界內，借由攻擊別人、看輕別人、甚至蹧躂別人來敨放壓力，閣加上仝溫層的認同佮放大，通來平順遐的不如意的情懷。
第二類網路酸民的意識型態誠強，意識形態多數是對政治、政黨、信仰、種族、職業的堅持，認為家己的政黨、信仰、種族或是職業是上優秀的，因此，非我族類，就欲共伊翕好死。這佇現實世界，受到法律的約束，是做袂到的，網路的虛擬世界就順勢成了出口。這類的網路酸民，上大的特色就是啥物話題攏會當共伊牽拖對意識形態去，比如明明只是咧講教育的缺失，伊就是欲共伊怪罪到政黨、怪罪到種族、怪罪到科系，閣透過仝溫層的認同與放大，通來滿足自我意識形態的優勢。
第三類網路酸民的主觀真強，無法度接受無仝的觀點，簡單來講就是存有偏見，只是這个偏見無一定佮意識型態有關。偏見的產生佮教育有真大的關係，毋管是學校教育或者是社會教育，當一个人的思考模式予人定型了後，伊看代誌的角度就真難跳出原來的框架，因此，看著言論的邏輯無仝時，就會共伊反駁，通強化家己邏輯框架的正確性。
頂頭三種類型並毋是會當清楚切開的，一个網路酸民有可能同時兼有三種類型，當然變酸的程度就會更加劇烈。
網路的美麗就在於伊是上大的圖書館，因此，伊可能會包含著互相對立的資料或者是拄好倒反的論點，這攏是算合理的，無一个中央政府，或者是一个權威機構會當強勢決定啥對啥毋對。承認了這个事實了後，就較會當接受網路酸民的人數其實只是網路這个新世界內面的少數，伊的存在拄好展示這个美麗新世界的多元性佮包容性，因此，除非予網路酸民傷害到無提告袂使的程度，若無就盡量莫抾恨。換一句話講，欲減少網路酸民的人數，絕對毋是靠人為的介入，只會當靠網路佮酸民本身的力量。
第三類的網路酸民是上有機會透過自我學習、自我教育來改變的，網路既然是上大的圖書館，只要抱著開放的心態，就絕對有機會看到各種觀點的言論，透過整合來修正家己的偏見；閣再講，網路也是上大的交流平台，也絕對會當揣著某一个人願意奉獻無仝的思考角度。
第一類的網路酸民只要生活環境改變，就有機會漸漸脫離酸民的行列，因此，若會當善用網路上百百款的創意(不管是來自私人、商業、學術或是政府部門的資訊攏好)，來協助解決學業、事業、情感、或是健康的問題，這反倒轉會當做為網路正面價值的再肯定。
第二類網路酸民會是上需要時間的，因為意識型態的形成毋是一時間的，因此，也無法度寄望佇一時半刻內就改變，毋過，會當借用佛法的修行理論，就是逐改佇欲開喙罵人進前，就先暫停幾秒鐘，問家己這敢是我的意識形態咧狡怪？這種觀照的功夫，就是避免不知不覺中落入意識形態的上好修練。
咱毋是講，也毋敢期望，網路酸民攏會當透過網路或者是家己的力量，去消除酸民的行為。頂面只是提出一寡可能性，提供予有這个意志的人參考爾爾。其實，就親像美麗的網路新世界仝款，網路酸民也會使是真美麗的。看著這个美麗的虛擬世界已經徹底改變了人類的生活環境，網路酸民的存在敢會正正咧教育咱，叫咱愛學會按怎佇無仝的生活環境、意識環境、以及智識環境下做伙生存，來成就網路的多元性、豐富性與包容性，更加成就伊無限的媠。
