Linegrexit的反省

Linegrexit是我模仿Brexit所創的詞。Brexit (British Exit)是英國脫歐事件的簡寫，Linegrexit (Line Group Exit)就是退出Line 群組事件的簡寫。

因由是：最近看到老朋友的困擾，講伊的Line群組的某幾个人，突然間變甲足強勢、互相燃柴添火著，無時停咧大力宣傳特定的政治信仰，好親像逐家若無同意遐的人的理念，天就會塌下來仝款，吵甲看群組訊息時，壓力變甲有夠大，最後實在是擋袂牢，只好揣一个借口退出群組。退出了後，情緒較平穩矣，毋閣心中難免留有一寡遺憾。

這是典型的「社交平台症候群(SPS，Social Platform Syndrome)」，症頭包括：

1. 若無人邀請你入去群組，就會感覺予人放捒，心頭憂悶；

2. 予人邀請入來群組，看著別人足捷PO文章，家己無PO一下，感覺真歹勢，開始出現壓力；

3. PO文章了後，無人讚聲，感覺無人重視，想著無意無意矣；

4. 看著無佮意的言論，有時心慒慒，有時氣怫怫，開始有退出的念頭；

5. 愛惜面皮，勉強留佇群組內，毋閣逐工若看著訊息，時常就心狂火著；

6. 退出群組好無？心思逐工佇遐捙跋反，有夠苦惱；

7. 退出群組後，雖然創傷消退，心情猶是有淡薄仔憂悶。

這種症候群的案例，佇社交平台愈來愈普遍的情形下，變甲愈濟也愈明顯。毋過，並毋是逐个群組攏會按呢，猶是愛看群組的性質：若是單純是佇網路頂的，逐家攏毋捌見過面的族群，基本上較袂出現這種症頭，一般攏是講退就退；但是，當群組本身就是一群現實的朋友時，比如同窗群組、同事群組、同業群組、同好群組、同遊群組(一起出遊朋友)，症頭就較明顯。

回顧咱台灣上捷使用的社交平台的發展史：Email、BBS、部落格、聊天室、Facebook、Line，對非同步、單向、單純是文字，演化到即時、雙向、含多媒體的交流，功能是愈來愈強，但是敢有帶來較好品質的心靈或是實際價值，就值得詳細分析囉。這篇文章毋是欲探討各種社交平台的功過，因為網路上這種文章已經誠濟，只可惜，會使借鏡的所在卻是無蓋明確，這篇文章想欲用台灣在地上流行的Line做對象，專心來探討Line佮SPS的關係，以及應對的方法。

阮認為Line平台的設計理想應該是：

1. 快速的連絡工具：命令的傳播、會議的通知、訊息的溝通、招團的活動

2. 促進人際關係：感情的維繫、朋友的近況、純粹開講、互相安慰

3. 增加見聞：心靈雞湯、生活小秘方、健康小祕方、流行話題

4. 專業研討：專業的討論、業務的討論

遮攏是真好的理想，也確實有真多群組成功來實現遮的理想，帶予成員佇生活環境上莫大的正面影響，毋過，造成負面影響、甚至引發成員SPS症頭的失敗案例嘛袂少。阮發現，會引發成員SPS症頭的群組，有幾個特性：第一、群組的成員佇虛幻佮現實間有交插著；第二、成立群組的宗旨無清楚界定；第三、部分成員主觀強烈閣興喋；第四、群組無管理或協調機制。論述如下：

1. 虛幻與現實相交插的成員組成：因為無法度佮現實的世界割開，傳統上「人情留一線，日後好相看」的觀念，就會扮演真重要的角色，致甲無法度佇群組內盡情表達家己的情緒，累積久來，慒心感自然就出現。

2. 無清楚界定群組宗旨：因為無佇事先講明群組的宗旨，造成予成員無限言論空間的錯覺。若是群組的目的真明確，無希望因為無適當的言論影響著成員的情緒時，上好佇開頭就表明，比如：無歡迎有關政治、宗教、種族、性別、職業等有可能引起較激烈的對抗話題，阿若無，一旦走精去，慒心感就會瞬間衝懸。

3. 成員主觀強烈閣興喋：主觀強其實猶好，只要會當保持風度，接受別人仝款的強主觀，就無一定會出問題。上麻煩的是，又閣興喋，所以上愛用「我食的米比你吃的鹽較濟」的序大人姿態、干焦我上著的氣口說話。我捌看過親像「就承認九二共識就無代誌矣」這種的言語，你講哪袂引起對立、引發慒心？

4. 欠缺協調抑是管理機制：群組一般來講袂設置管理員對訊息做管理，因此任何訊息一出來，除非本人會當自覺、自律做刪除抑是收回的動作，阿若無，就親像一粒暗藏的炸彈。若不幸真正引起嚴重的對抗言論時，佇無人管理的情形下，群組基本上就會分做三派：贊成派、反對派、佮恬恬的中立派。嚴格來說中立派嘛毋是一派，因為恬恬無表態的理由百百款。群組一旦分裂，成員的慒心感自然就會出現。

毋管是頂懸佗一个因素，只要群組成員出現慒心就毋是好事，因為這時是毋是欲閣繼續留佇群組，就變成內心誠滾絞的難題，最後難免淪落到典型的SPS症頭。這佇群組的組成是年紀較大的成員時，比如退休人員群組、小學同窗群組更加有可能，因為這時逐家攏有年紀矣，經驗豐富甲有賰哩，主觀嘛強佮有賰哩，意見的表達更加順口，一个無注意，頂懸的現象就會出現。我的老朋友的困擾：退出群組前的慒心，退出群組時的礙虐，佮退出群組後的無奈，就毋是少數人的專利囉。

針對頂懸可能引發SPS的第二及第四个因素，阮建議Line官方會當考慮增加下面的機制(攏無偌困難)，來強化紀律：

1. 群組宗旨部分，只需要加一个副題，予建立群組的人會當佇頂面說明建立的宗旨；

2. 群組管理機制部分，會當賦予建立人預設的管理員權限，比如會當檢視訊息的敏感度，暫時共伊罩牢咧，等佮發訊人溝通後，才決定是毋是放行，就會當爭取衝突發生前的一瞬間。

對於已經染著SPS症頭的成員，阮會當了解，決定退出群組時確實是真滾絞的，因為會想欲顧著其他成員的感受，毋過若繼續留落來，閣袂當避免SPS症頭的摧殘，傷害就愈大。兩爿相比，我猶是較贊成就來一个Linegrexit，畢竟加入群組的目的是欲接受正面能量，若顛倒受害，何必要委屈家己？退出群組真簡單，只是一个動作而已，但是有時會引起群組真大的震盪，尤其不實的猜疑滿天飛時，群組的未來發展就罩著陰影囉。因此，決定退出時，較適當的作法，就是發表一下退出感言，共真正的原因講清楚才退出，然後就真正放下，無必要閣掛心群組的一舉一動。

像我這種年紀的人來看Line群組的上大功用，檢采是連絡親友感情。畢竟，天南地北，有高鐵、飛機也無可能講欲見面就會當見面。有一个Line群組，親友「見名如見面」，就無需要感嘆「海鶴一為別，存亡三十秋」，或者是擔心「遍問舊交零落盡，十人才有兩三人」，毋但會當解決古早人思念遠在天邊的親友的苦，閣會當隨時透過Line呼叫「老去一身須愛惜，別來四體得如何」。親友的聲音、形影、生活上的喜怒哀樂、趣味迷人的經驗、甚至花邊新聞，攏會當佇第一時間映入阮眼、傳入阮耳，真正是一大享受啊！

最後，對於頂頭第三個可能引發SPS的因素，阮想欲奉勸所有Line群組的成員，好好珍惜這份科技帶來的正面力量，毋通任性、逞性，堅持欲放送佮群組宗旨無關的言論，引發其他成員的SPS症頭，毋但破壞了遐濟年的情誼，嘛會可能傷害著老來上重要的情感倚靠，就未免會曉算袂曉除、損失足大囉。

科大生英文 - 師生、學校、產業界的共同惡夢

定定聽著科技大廠老闆咧遐感慨，講誠濟科大畢業生，看毋捌英文手冊，予廠商真頭大。作為科大教育體系的一份子，其實嘛誠感慨。早前，科大生源攏來自高職時，感受愈深。

以前我佇咧上逐屆科大新生的第一節課時，慣勢分白紙叫學生寫寡資料，通做為安排課程內容的參考，比如：畢業的學校、學過的資訊專業課程、表現上好的課程、會曉用的程式語言等等。最後一定會問：提國中時的程度來比，你認為家己這馬的英文程度如何？誠出人意料的，定定有學生回答講比國中較爛。佇學生開始上程式設計課時，交出來的手寫的程式語言的保留字中，發現b/d佮p/q正倒不分時，真正證實了科大生英文26个字母猶無法度正確認捌的傳說。

我凊彩查一下某仔乜高中佮高工的資訊科課表，發現高中逐禮拜有6點鐘的英文(包括輔導課)，差不多逐天攏會當看著英文老師，而高工部分才干焦有2點鐘。三年落來，高職生學無到1/3的高中生的物件，莫怪科大新生會有國中學的攏還轉去予老師的感覺。

早期科大推甄需要面試時，教授為著欲挑選英文程度較好的學生，時常要求學生用英文自我介紹，久來學生學乖囉，會先背好文稿，到時就規个共唸出來。後來教授嘛學巧囉，當場隨便揀一篇專業文章，請學生唸某一節，並做解釋。這馬想起來，實在有傷過相信科大生英文程度的感覺。

會記得十外年前，科大流行訂定英文畢業門檻，想欲用來提升科大畢業生的英文能力。基本上，是要求學生去報考「全民英語能力分級檢定 (GEPT)」 、「托福 (TOEFL)」、「雅思國際英語測驗 (IELTS)」、 或者是「多益測驗 (TOEIC)」，規定測驗成績需要達到某乜標準了，才會當畢業。實施了後，亂象一堆，因為總是會有無法度通過標準、無法度畢業的學生。毋過，畢業是學生的重大權益，為著避免予人告講無緣無故去傷害學生的權益，學校若毋是降低及格標準，低到甚至無實際意義的地步，就是另開後門，佇畢業進前選修一門所謂的「補救課程」，或是通過校內自訂的英檢，就放行。看來，欲靠這個畢業門檻政策，來提升科大畢業生的英文能力，是無啥可能的。今年，最高行政法院總算判定，「先英檢才教學」的規定有違法之顧慮，部分學校才放冗廢除英文畢業門檻，總算無閣共科大生舞甲忝甲欲死。

頂個月，行政院宣示，明（2019）年欲確立台灣的「雙語國家」政策，台灣將成為同時使用「中文」佮「英文」的雙語國家。這是件關係全民英文能力的大事，想起來家己是無能力提出啥物有價值的建議的，毋過我較擔心的卻是，若無佮有效的辦法來提升目前科大生的英文能力，這个國策變成空喙哺舌的機會猶是真大的。

針對提升科大生的一般英文能力，我的看法有較保守，因為我認為先設法提升科大生的「專業英文能力」有較實際。目前科大的英文課程規劃，猶原偏向傳統的一般語言訓練，欲達到以專業為目標的訓練成效，無遐簡單。

咱先來界定我所謂的「專業英文能力」，伊包括：會當「看英文專業文章」、會當「寫英文專業報告」、會當「做英文專業簡報」等。基本理念就是欲養成學生強烈的專業英文語感，一拄著專業討論時，腦中自然會用英文方式思考。下面做一个說明：

一、看英文專業文章(包含操作手冊、技術手冊)的能力。這會使對下面幾個角度來培養：

1. 共「英文專業術語」做為字詞的背誦核心：目的是予學生熟似英文專業術語，避開翻譯所引起的誤解，會當更加深入來掌握專業術語的技術內涵。

2. 採用英文專業課本或者是英文專業文章：英文專業文章，尤其是科技文章，真濟是用簡單式語法，因此，只要會當確實掌握現在簡單式、過去簡單式、未來簡單式等時態，上濟加一个被動式句型佮附屬子句(倒裝句大概是袂用著的)，就會當勝任看冊的需求。訓練的重點是避開複雜語文結構的干擾，予學生漸漸慣勢簡單直觀的英文語法。

3. 看食市的現代英文小說，尤其是玄疑小說：目的有三：(1). 食市玄疑小說，情節起起落落，會當一下仔就共讀者吸引入去，學生會使用伊來轉換看冊的情境，延長看冊的興趣；(2). 食市玄疑小說，用著真濟的俗語話，所謂俗語話多數是用簡單單字構成，因此是活用與擴大簡單單字語意的最佳教材；(3). 食市玄疑小說，佇語法上比較較單純，重點會下佇犯案細節的描寫，做為破案的痕跡，細節的描寫其實就是生活情境的描寫，對毋捌佇國外實際生活過的學生，是了解異國生活情境的上好管道。

二、寫英文專業報告能力。一般來講，咱會使共大腦中會記得的字詞分做兩區：認捌區貯的是咱佇看冊時看著就會認得的字詞；應用區貯的是咱佇作文時用會出來的字詞。認捌區一般比應用區加真大，因此，多數人看冊時會當看捌誠深的字詞，但是作文時卻用袂出來。咱閣發現作家囥佇應用區內的字詞比一般人確實有較濟，可見，作文正正是培養字詞應用能力的上好門路。下面列出幾種英文作文的訓練機制，會當用來慢慢擴大應用區，培養出較強的字詞應用能力：

1.寫英文讀後感抑是聽講心得：目的是訓練學生對冊裡的材料抑是聽演講的材料內面整理出讀後心得，並對模擬文章中的句子開始，用英文共心得寫出來。這是培養字詞應用能力的好方法：從模擬、改寫到自創。

2.製作專題簡報：要求學生用英文共專題的進度抑是成果整理出來，並製作簡報。一般來講，簡報多數干焦列出大綱、要點，袂寫甲傷詳細，因此，上好提來磨練文句。

3.寫日記或週記：要求學生用英文共逐天(若傷難，會使改做逐禮拜)值得記錄的代誌寫落來，這个較有挑戰性，因為毋一定干焦是專業事件，也有可能佮情緒有關，但對著維持英文思考方式佮培養字詞應用能力攏誠有好處。

三、上台用英文做專業簡報。這是訓練學生用英文開講的好起點，因為有簡報做基礎，學生只要會當共簡報上的大剛先念熟，才閣小可解析一个就會使。下面是學生會當用來準備簡報的練習技巧：

1. 看簡報，自言自語，或者是對空演說，一直到看著逐張投影片，攏會當用英文順利講出重點為止。一般來講，愈會當掌握專業內容，英文會講甲愈順。

2. 隨時做英翻譯的工課。也就是講，啥物時陣看著或聽著一句話，第一個念頭就是設法共伊翻成英文，年久月深，英文思考方式就較定性囉。

頂懸的三種能力，因為牽涉著專業智識，若由專業教師佮英文教師協同教學，應該會當收著較好的成效。另外，第四種能力：聽力，若毋是強調佇一般的英文聽力(因為主題廣泛，確實有一點難度)，而只是注重佇聽專業演講，我感覺無必要傷擔心，因為專業演講的英文句型，甚至比專業文章閣較單純，佇頂懸的三種能力養成後，有英文專業術語做護身，只要演講者的速度莫傷快，聽七、八成總有可能的。

科大生的英文一直是學生、教師、學校與產業界的共同惡夢，這个問題若是會當得著實質的解決，會比全民英文能力的提升更加實際，對社會的貢獻也更加直接、更加重大。這篇文章試看提出一個用專業做目標的提升科大生英文能力的方法論，注重佇科大生專業英文的讀、寫佮講的能力訓練，裡面部分方法其實也是家己實行過的經驗。希望會當對有志脫離這個長期惡夢的科大生有所幫助。