高教多元的升學制度已經實施幾若冬，一直以來上顧人怨的問題是：階層流動愈變愈䆀，彼是文言文，白話講，就是家境清寒的學生愈無法度翻身。相關的研究也指出，除了繁星推薦方式，小可會當減輕這个問題以外，其他的多元方式，顛倒會造成卡死階層的流動。階層流動是一個活力社會真重要的機制，教育的目的本來是欲強化這个機制的，這馬煞咧弱化這个機制。目前拄仔好是今年各招生管道接近尾聲的時陣，這个問題誠值得進一步來探討。
咱先共目前高教科大的各多元升學管道(一般大學的多元升學制度會當類比)列咧下面：
1.繁星推薦（一校會當推薦12名），予高職學校推薦成績優秀的學生申請
2.技優甄審／保送（無佔招生名額，簡單講就是外加名額），予國際或全國競賽表現優等的學生申請
3.推薦甄選（佔招生名額70%），用四技二專統測成績佮高職學習歷程來申請
4.登記分發（佔招生名額25%），按照四技二專統測成績佮學生的志願統一分發學校
5.單獨招生，予招生無好的學校招收猶無學校讀的學生
6.其他管道：甄選入學就業體驗組、原住民、運動績優生、身心障礙學生等。
遮爾多元的入學管道，目的是予無仝款能力的同學攏有升學的機會。
首先，咱來看這幾个管道中影響上大、佔招生名額上大宗的推薦甄選。伊的設計理念是希望透過備審資料，判斷出佇學業上可能無蓋突出，但是猶有其他突出能力的同學，有模仿美國大學申請制度的痕跡。推薦甄試這个管道目前需要繳的資料（無考慮階段）主要有：
1.統測成績
2.讀書計畫
3.簡歷／自傳
4.在校學習成績／課外表現等等（後面幾項未來會對高職的學習歷程檔案掠出來）。
按照這个順序，大約會當類比美國申請大學的資料如下：
1.SAT （Scholastic Aptitude Test）抑ACT（American College Test）考試成績
2.讀書計畫或短篇作文
3.申請表
4.高中成績單
5.推薦批。
除了推薦批外，看起來攏真仝款。若是美國這套會當予各校揣著四配的學生，為按怎佇台灣施行起來若會走精去？敢講是風水袂合？
咱閣較深入來看這个現象，就會發現，干焦抄襲，無一定有效，因為兩地的文化差別，就會當予任何模仿品失效。其實，推薦甄試本來嘛需要繳推薦批，最後卻取消了，因為發現推薦批，完全無法度提供任何正面的資訊，來幫忙做學生的挑選，干焦擾民爾爾。會有這款差別，主要是美國文化內面，人際關係的處理較直接，學生的程度按怎，推薦批就寫按怎，台灣文化就無仝，推薦批一般是報好無報䆀，尤其想著講會當幫忙學生，老師更加是拚性命歕，逐个人毋是Top 5%，就是非常優秀，按呢的參考價值自然無大。曾經發生的真實代誌：甄試無牢的同學，接著學校退轉去的備審資料時，發現密封的推薦批猶是密封好好，也就是講科大端連批攏貧惰拆開矣。
除了人際關係直接外，美國文化內底，猶有幾項價值觀，也是予申請制度會當成功的原因：多元價值、大學教育高等化、資本主義。因為是多元價值的社會，因此，讀大學毋是唯一的出路，甚至4年的學制也毋是唯一的大學之路；因為大學是高等教育，因此，除非能力有夠，若無無人會浪費時間佮金錢，折磨自己去讀一个學位；因為是資本主義社會，因此，無錢就莫想遐濟，去夯枷揹學貸。總講一句，備審資料之所以值得相信，就是因為遮的社會價值觀，已經自動做了初步的挑選，各校只要好好對挑選過的學生內底，揣出能力較四配的學生仔就好。
反觀台灣文化的幾个價值觀：單一價值、大學教育通俗化、無純粹的資本主義，卻大大降低推薦甄選的成效。首先，台灣社會長期以來，一直停留佇萬般皆下品、唯有讀書高的單一價值觀，因此，無讀大學就敢若世界末日、無法度佇社會徛起仝款，讀大學竟然會使佮需求、佮能力無關；閣再講，大學教育已經予咱舞甲若像通俗教育，無讀一个學位就敢若綴人袂著、矮人一節；最後，台灣的社會毋是純粹的資本主義社會，勉強講，算是摻著社會主義精神的資本主義，因此，大學學費一直控制佇無蓋貴的範圍。遮的價值觀四界咧鼓勵所有的人去申請大學，也就是無法度做啥物挑選機能，這時的備審資料，自然佮個人的需求、能力、佮企圖無啥關連，推薦批自然也無啥參考價值。因此，咱看著在校學習成績出現了集體造假的事例，一點仔都袂意外。猶閣有比這較譀古的，親像下面的真實事件：科大端直接用統測成績做排行，才閣去看備審資料，揣看有較特殊的同學，值得破例提拔(這个機會真稀微)。按呢的作法，除了違反推薦甄選原來的設計理念外，佮登記分發或者是聯招有啥差別?
申請制度的好處是想欲促進多元性，但是上明顯的缺陷，卻是對高社經族群佮優勢種族的學生較有利，致甲衍生出公平性的問題。對美國的文化價值觀來看，這个缺陷較袂引起人探討，不過，猶是有寡名校，誠有教育良心，會透過策略抑機制，予學生的來源盡量莫受著區域、社經地位、宗教、文化佮教育背景的影響。佇台灣，當遮的高社經族群、大都會地區、學業成績較優秀的學生攏予名校收去，加上台灣的名校差不多攏是公立的，學費較便宜、學習環境較好，就自然會突出弱勢家庭的囝兒，干焦會當讀學費高、學習環境較䆀的私立學校，若按呢，像早前，咱想欲靠讀書來改善生活的機會，自然受限。佇頂懸講的台灣文化價值觀念下，這自然就變成逐家注目的焦點囉。
紲落來，咱來看登記分發這个佔招生名額第二大宗、上古老、一試定終身的管道。這个管道雖然定定聽著講有人無小心落第的遺憾，但是上大的優點就是單純、公平，歷史也證明，確實有真濟人透過這個管道，共家庭的階層提升到中產階級的地步，達成階層流動的效果。這也是這幾冬來，恢復單一聯考的呼聲，攏毋捌停過的理由。但是這个管道上可怕的所在，卻是予萬般皆下品、唯有讀書高的單一價值觀，長期主宰整個社會，學生用智育分懸低，學校用智育做標準，伊的代價就是繼續延遲多元價值社會的形成。對健康社會的角度來看，這个代價袂使講無沉重。
頂懸的分析，突顯了整個多元升學制度的一个困境：推薦甄選本來是欲強化多元價值，但是卻阻礙著階層流動，佇台灣社會價值觀下，推薦甄選的功能閣無法度完全發揮；登記分發會當幫贊階層流動，卻傷害著多元價值觀，這是關關相卡的困境。因此，多元升學管道的設計袂當閣只求滿足單一的目的。深入去看這个困境，阮認為升學制度的設計，上少愛滿足下面的三个目的，才會當對教育體系佮社會做出貢獻：一、各校會當揣著能力四配的學生，二、促進多元價值觀的形成，三、確保階層流動的機會。針對遮的目的，佇現在的基礎上，檢采會當按呢設計：
A. 推薦甄選：招收在校學習表現佮學校較四配的學生，若會當像美國仝款，佇高中職課程內，列入所謂的AP（Advanced Placement ) 課程予學生選修，就更加會當突顯學生的學習動機佮學習潛能。
B. 各種平衡管道：
1.繁星推薦(地區平衡)
2.技優甄審/保送(實務能力平衡)
3.運動績優生(體育平衡)
4.登記分發(智育平衡，唯一需要考試的管道)
5.甄選入學就業體驗組(職業體驗平衡)
6.原住民(種族平衡)
7.身心障礙(身心平衡)
各種管道攏佔總招生名額的一个比率，這个比率會當授權各校看學校的性質調整，但是任何管道攏袂使比某乜底線較低，按呢的設計才有可能同時滿足頂懸講的三項目的。但是這个設必需要有一个真重要的配套措施，才會當發揮效果，彼就是學校必需要為無仝款管道入來的同學，設計出對應的學習體系，按呢，無仝款能力的學生，才會有適合的環境通精進能力，畢業了也才會當展現階層流動的效果或者是促進多元價值觀的形成，若是所有入來的學生猶閣仝款囥佇仝一套學習體系，最後一定是學習路途坎坎坷坷，按呢，入學管道分流的目的就做白工囉。
最後，為著欲消除高教予咱舞甲若像通俗教育的亂象，予升學制度較有挑選功能，有站節去減少學校的數目，也是袂當閣拖沙的代誌。
