公視台語台的節目會使閣較精進咧

今年七月初一，公視二台正式改名做「公視台語台」，成做台灣第一間標榜完全用台語播出的電視台。公視台語台的出現實在是台語教育的一件大代誌，因為所有對母語存活、母語普及等母語正常化的向望，也就是咱定定佇講的一个語言欲存活，逐家愛會曉的的四大能力：聽、講、讀、寫，攏囥佇伊頂頭。帶著遮爾深的向望，電視台佇節目頂頭，敢有認真規劃，通確實來提升國人台語的四大能力咧？以目前的節目看起來，敢若猶有精進的空間。

首先，阮真佩服電視台的努力，佇遮爾短的時間佮有限的經費下，就做出誠濟類型的節目，包含智識性的、娛樂性的、歷史性的、地理性的等等，實在無簡單。毋過，節目一下濟品質就歹控制，品質三不等也袂意外。下面所講的問題，有大有細，但是對電視台欲達到當初設立的宗旨，加減有關係。寄望電視台的有識之士會當提來參考，通予電視台佇母語的教育上，有較好的成效。

1.　字幕會當閣較頂真咧

字幕是認捌台語字上重要的管道，對著台語的讀佮寫的能力有絕對的影響。可惜，除了佮台灣有直接關係的節目，比論早起、中晝佮下暗各段的新聞、台灣歷史風土、台灣飲食文化、台灣連續劇等，有較正確的字幕外，多數節目的字幕毋是直接提華語的字幕來用，就是摻著華語的痕跡，這佇外製的節目頂尤其明顯，實在是毋好，觀眾會予舞甲霧嗄嗄，煞毋知影佗一種寫法才是著的。對復振台語的角度來看，有統一的台語字是上重要的基礎，因為讀佮寫台語文章的能力攏愛靠伊。這部份若是因為時間佮經費的限制造成的，致使無法度閣開時間佮金錢共外製的節目重新配上字幕，就真可惜，因為按呢省事事省的結果，毋但無法度達到母語教育的設台目的，而且閣浪費了遐爾好的頻道資源。

2.　口白會當閣較細膩咧

這个現象佇播新聞時定定看著：主播用的是台語，進入新聞影片時口白煞變做華語，看起來是無心共華語的影片口白重新配過所致。這絕對毋是好代，會予人一个真毋好的感覺，若像電視台凊凊彩彩咧做台語節目仝款，或是台語無法度真自然用佇某某領域，比論科技、抑是西洋文化仝款。其實，語言只是工具，只要工具有夠熟練，欲佇真緊的時間內、講啥物內容攏會真順序才著，有心上重要。

3.　文讀佮語讀的使用會當閣較自然咧

台語咧唸冊時基本上是用文讀音，就若布袋戲咧搬古戲時的文言口白，若咧日常開講時就較捷用語讀音，所以若會當，新聞的主播會使用較濟的文讀音，因為主播稿多數是寫佇書面頂的，佇咧播新聞內容時，就會使用較濟的語讀音，因為翕起來的影片多數攏是日常的生活點滴，用語讀音會較接近一般人的生活經驗，也較好了解。這馬的節目敢若無這个認捌，煞有小可亂去，如果字幕閣無好好仔配合，有時確實會造成混亂。

頂懸的幾項建議，會當予節目的品質較完美，但是需要較濟的財力、人力佮物力的投入，電視台有可能會感覺真為難。其實，若會曉善用社會上濟濟有熱心的個人佮團體，這个工課無想的遐難。比論，政府／電視台若會當開一个時間來建立「台語人才資料庫」，收集對台語有熱情閣有基本能力的個人抑團體，佇電視台需要鬥相共的時，請出四配的個人抑團體來幫贊，多數熱情的個人甚至會當免費來服務。這个安排一來會當減輕電視台的負擔，同時閣予相關的人才有發揮專長貢獻社會的機會，一兼二顧，何樂而不為呢？

公視台語台的設立是母語教育路上的一个重大里程碑，節目的安排一定愛更加周全，電視台也一定著愛付出較濟的心血來經營，才袂去辜負著當初設台的一番好意，也較有可能滿足咱逐家對母語傳承的深深期待。

大學退場遮拖沙 高教災難苦袂煞

吵吵鬧鬧超過十偌冬的高教學校退場機制，真明顯無法度解決少子化造成的，學校面臨倒店危機的困境。到這馬為止，成功轉型的只有：1.高鳳技術學院轉做私立貴族學寮型小學，2.興國管理學院轉做中信金融管理學院；猶咧努力轉型的有：3.永達技術學院，想欲轉做職業訓練中心，4.高美醫護管理專科學校，想欲轉做長照機構；卡在變相轉型危機的有：5.亞太創意技術學院。另外，猶有因為弊端予教育部下令停辦的南榮科技大學。國內這馬有150幾間大學，前教育部長吳思華曾經講過，「若無減少到100間，會是高教的大災難」，以目前遮爾慢的退場速度，這个大災難敢若是避無路囉。

這篇文章無想欲閣再提各校的學生數據，來說明退場的危急，這佇網路頂無欠缺；也無想欲討論有佗幾間學校馬上會陷入招生危機，或者是可能被迫退場，彼佇網路頂嘛濟甲窒倒街；也無想欲談論高教校數敢真正傷濟?或者除了退場佮轉型外，敢就無其他的方案來解決校數的問題？等等遮的緩不濟急的問題。咱想欲對現實面來看，為啥物退場速度會遮爾慢？

首先，教育部毋是無咧做代誌，對2014年修訂私立學校法，2015年訂定高等教育創新轉型方案，2017年完成私立大專校院轉型及退場條例，滿四界咧幫忙學校想辦法。其中，私立學校法規定了私校合併/停辦/改辦/解散的基本做法；高等教育創新轉型方案擴大轉型標的，比如允准轉型做職業訓練機構或者是改建做社會住宅；私立大專校院轉型及退場條例特別撥出50億做退場基金，來協助「專案輔導學校」，閣規定三年輔導未成，會當強制轉型抑是退場。除了上新這个基金運作的成效需要閣觀察外，對頂頭講的退場校數來看，遮的措施的效果差不多是零，問題到底出佇佗位？

咱看著的第一个問題是，無共退場佮轉型分開，做無仝的處理。退場是學校團隊收工，和紲落去的經營袂閣有觸纏，轉型卻是仝款的學校團隊，只是經營的事業改變。台灣的私立高教學校，普遍存在家族私有化、校產家產分袂清的問題，對直接退場或者是轉型的感受有真大的差別，共退場佮轉型分開處理，才袂因為轉型的困難，去拖沙著進度。

第二个問題是退場佮轉型的輕重分袂清楚。退場是實際上去減少校數，是正面對削的利器；轉型卻猶有可能留佇高教體系(比如中信金融管理學院)，實際上並無解決少子化引起的問題，也就是退場才是重點。這改的退場基金若會當以鼓勵退場做主軸，設計上就會無仝，效果才會出來。

第三个問題是公務員的保守心態，因此，有偌好的方案，嘛無法度有效執行。咱會當了解，私校董事會一定會毋甘校地，若無強大的誘因，講退場就敢若佇和尚頭咧掠蝨母，無彩工。2010年教育部家己的「韓國高等暨技職教育改革考察」報告就點出來，韓國政府為著加速私校退場，同意學校處分不動產後，將收入的一半，還予私立學校創辦人抑董事。監察委員陳小紅2017年針對私校退場機制的調查報告，也特別舉出來，請教育部好好思考，結果是教育部家己人反對，講一堆親像董事會已經變更、後代子孫濟濟、龐大校地利益驚出弊端等等無法度有效處理的理由，其實腹內就是公務員的保守心態，驚去予圖利財團的利劍傷著。

第四个問題是退場無簡單，轉型更加困難，因為欠缺部會間的協調機制。2015年的創意轉型方案，就建議會當共轉型標的擴大，甚至興建社會住宅，毋過，教育部無法度單獨處理地目變更、建築法規適法性等等的複雜作業，這大部份是內政部的職權，因此，成立一個部會間的協調機制，來拍通遮的環節，對轉型才有幫贊。

針對遮的問題，阮的解決策略其實誠直接，就是單獨訂定一个私校退場特別法，專門處理退場問題(無含轉型)，來排除相關法律的束縛。本法必需要確實保障公務人員去積極做代誌、毋免驚犯法；明訂校產處置原則，予董事會有夠分的誘因；明訂對教職員的勞動權佮退休、遣散，以及學生受教權的保障。檢采有人會問為啥物毋直接提2017年的轉型及退場條例來用就好，阮不以為然，彼的法案除了退場佮轉型無分開致甲機制混亂外，伊更加限制了原來私校法的私校清算處置方式，對退場更加不利。

另外，就是閣單獨訂定一个私校轉型特別法，專門處理轉型的問題，因為這个問題比退場更加複雜。其實，部會間的協調機制會當靠行政命令來處理，基本上，毋免另立新法，但是若欲再次擴大轉型標的就需要，因為需要排除現有法令的束縛，才會當解決原本轉型的濟濟困難，包含欲接手學校的企業無濟、文教事業歹經營、小型學校歹生存等等。基本上，本法欲賦予學校有解救企業予伊莫倒的利器，比如合併就是一个真好的轉型標的，但是愛予被消滅的學校共退場仝款夠分的誘因佮安置手段；甚至會當同意校方大膽處置校產來救命，比如南亞技術學院為著欲取得資金做教職員離退用，賣地求生；2015年創意方案的轉型標地當然會當列入，但是愛閣加入閣較濟的創意轉型標的；最後，針對逐種轉型標的，愛明訂轉型標的存活的目標、機制與運作規範(包含教職員佮學生的安置策略)。像按呢的濟濟轉型誘因，才會當引導實際的轉型效果，袂閣只是佇高教體系內做換湯無換藥的硬牚，也才會當確實幫忙解決高教少子化的危機。

這幾年，較辛苦經營的高教學校，為著欲爭取佮晏退場，招生的招式層出不窮，比如教師評鑑佮招生率掛做伙、幫高中職學生繳報名費、透過兼課幫高中職教師申領教授/講師證、甚至揣中人偽造人頭學生等等怪招百百款。但是，生源猶是愈來愈少，最後，免不了愛共招生較無好的科系關掉。前幾冬，教育部猶有咧注意佮國家基礎建設較有關係的科系，親像工學院，不准自願停招，毋過，擋袂牢少子化的衝擊，這陣嘛較毋敢插矣，致甲各校亂關一場，莫怪有人開始煩惱，無偌久工學院會關了了，那按呢，不如共學校關掉。毋過，佇退場做法猶閣霧煞煞的時陣，也只好堅持莫退場。退場特別法佮轉型特別法的訂定，就是欲消除遮的亂象，予學校會當安心去思考，是毋是收收咧，來退場抑是轉型，較是正途。

迒域學習哪通滾笑?

高教深耕計畫會當講是近年來上十花五色的教學計畫，除了進前咱討論過的「學習樣式的改變」(2018/04/13教育方法袂當離開適合性)，以及「微學分」(2018/08/06高教大痟微學分 學生微成效)外，最近猶閣發現一个「迒域學習」的設計，這個設計的目標宣稱是欲拍破科系个界線，予學生無受限的職業生涯。根據目前各校的設計佮實務推動的機制來看，是毋是真正會當達到這个目標，是真值得探討的。

首先，咱來回顧，是按怎會出現「領域」的分割，上早的觀念是領域對應到一套專業智識，這套智識會當用佇某一个行業，去執行彼个行業界定的工課。也就是說，領域只是專業領域的簡稱，代表了一套「專業智識」。咱上捷看著的學習機構，比如高教的科系，就是培育某一種特定專業領域人才的單位。共科系當做學校的基礎單位，會當專注佇特定專業智識的訓練，達到相關的資源，比如師資、課程、設備等等上蓋好的運用。

上開始，專業領域的界定，確實包含著行業的對應關係，毋過，行業或是行業的類型隨著時代的演進，有時變甲愈來愈幼路、有時會出現全新的行業，傳統的領域的界定，無法度閣直接對應到行業的困境，本就是會當預測的，迒域呼聲的響起，其實嘛是預料會著的。

佇這款共科系做傳統行業人才培育單位的基本結構下，因應迒域需求的上早的機制包括：輔系、模組、佮學程。基本觀念攏仝款，就是多一个第二專長：輔系清楚講明就是第二專長領域；模組代表的就是專業細分了後無仝的專長領域；學程的設計更加清楚，規定需要包含佗幾的系的佗幾的課程，來組合出新的第二種行業所需要的專長智識。遮的靠第二專長來修正學習目標的機制，看起來是無法度應付目前百百款的行業類型，才會出現迒域的需求。

咱閣回頭來看迒域學習的設計目標：拍破科系界線，透過迒域學習方式予學生有無受限的職涯。初初看著這个目標，感覺真恐怖：第一、拍破科系界線，有一種想欲共整個學校的結構攏拍拍破的印象；第二、職涯無受限，就是啥物行業攏會當做，隱含的是逐个行業攏無專業智識？抑是學生已經學會曉所有的專業智識？實務上，欲達到迒域學習的設計目標，猶是著看迒域學習機制按怎設計，基本上會牽涉著原來的機構有方便共舊的「專業智識」彈性組合出新的「專業領域」無，這是一个大學問，共伊囥佇高教深耕內做一个小計劃，實在真有參詳的餘地。詳說如下。

關於打破科系界線部份。其實，這是受著共科系對應到行業的觀念所害。若是咱把科系單純當做是專業智識的養成單位，先莫共伊提來佮行業做對應，按呢專業智識閣細分落去或是組合出來新的專業智識，來建構新的領域，去對應到新的行業，就毋是啥物困難的代誌。重點囥佇訓練學生按怎自我學習一套專業智識，以及按怎組合相關的專業智識。頭前面會當看做是科系的新使命，注重佇訓練學生按怎學好一套專業智識，後爿面會當看做是學院或者是學校的責任，注重佇訓練學生組合無仝專業智識的能力，實務上，「動態學程」應該是一个真好的實驗機制。這種設計干焦共學校各單位的任務做一个調整，無牽涉著實體架構的改變，同時予學院展示出真正的價值，應該是一个較合理的規劃。(台灣大學提出的用學院做單位，整合各科系執行「基礎探索＋專精主修＋迒域學習」的三層學習架構，有異曲同工之處。)

關於職涯無受限部份。若是頂懸所講的學校各單位的任務重劃會當成功，按呢職涯的部份，就是學院的另外一个重點。咱袂當預期學生畢業後的行業類別，因為隨時會有新的行業出現，但是咱會當訓練學生毋管佇佗一个行業攏需要用著的能力，這除了有逐家定定聽著的全人教育訓練外，基本技能也是袂當忽視的，比如：語言能力、資訊能力、自我學習能力、研究能力等等。遮攏是幫助學生開發無盡未來性的重要本錢。

綜合來看，迒域學習確實真重要，絕對毋是高教深耕下面一个小計劃做會到的。毋過，當學生的畢業證書上毋干焦記載啥物系或者啥物輔系或者啥物學程畢業的，而是寫著學著啥物新、舊的專業智識時，傳統行業或者創新行業應該攏較好對這份證書揣著合用的人才，那按呢迒域學習所做的所有努力就真有價值矣，也才算成功。

不幸的是，為著高教深耕的業績，這个迒域學習計畫，往往予人執行甲面目全非，莫講袂當達到頂懸所講的遠大目標，可能閣予各院系增加無謂的困擾。按怎講呢，咱來看一个案例：

某乜高教私校共迒域學習界定做「迒域課程體驗」，規定用學院做單位，安排各科系開放3點鐘予其他科系的學生「體驗」彼系的課程，包括：20分鐘科系簡報；40分鐘設備參觀；2小時課程體驗。問題就佇這个「體驗」設計，想欲予學生佇短短的3點鐘內，體驗著一套專業智識(或領域)的精華，實在毋是簡單的代誌，3點鐘連體驗一門課攏無夠，何況是一套專業智識。這若是一个大學的專業Orientation課程，予學生普普知影各系的專業內容，通做為未來迒系選修或轉系的參考，檢采閣講會當過，但是按呢佮迒域學習的目標，實在是一丈差九尺，差遠咧，閣加麻煩是，各學院、學系又閣著為著提供予各系學生做課程體驗，無閒甲反過。若是遮的辛苦，只是為著予高教深耕做業績，而對於實質的迒域學習，一點仔都無幫贊時，猶是省省咧，莫閣害遮的院系的主管啦。