有古味閣媠氣的台灣話

***揤遮就會當看著正確無亂碼的文章

*** 中文版本：古趣又傳神的台灣話

「台灣話」就是佇台灣一般人咧講的話，主要源自中國閩南的「泉州話」佮「漳州話」。伊是一个誠有古早味閣誠媠氣的語言，毋過，也是一个誠有可能失傳的語言，值得咱逐家做伙來關心。

泉州話的起源，是佇中國秦、漢、晉、唐朝時期，陸續有大批中原漢人為著避難，遷徙到閩南，帶來當時中原各國所用的古漢語，佮當地百越土生仔族語混合的產品。漳州話則源於唐朝，彼時的陳政、陳元光（開漳聖王）爸囝，由河南帶兵進入閩南開墾漳州，帶來當時中原通用的河洛話，所演變出來的。前者是台灣話「白話」音的主要來源，後者是台灣話「文言」音的主要來源。台灣話會當講是當今上純正的漢語。

由於複雜的歷史因緣，咱這馬教育體系用的語言叫做「國語」。一般人攏共國語想做是「北京話」，其實若聽過北京人講的純正北京話，就知影兩个語言實在是一丈差九尺。簡單講，國語是「無含入聲字的清朝官話」，而「清朝官話」又閣是「滿族話佮南京官話」混合的產品。

國語的強力推捒，共本來台灣人日常講話所用的台灣話，硩甲袂喘氣，致使這馬一部份人對台灣話產生袂少誤解，下面這兩點尤其嚴重：

一、台灣話無文字

這个誤解，基本上是泉州話佮漳州話傳來台灣時，是靠「語傳」的，毋是「文傳」的所造成的。回想咱囡仔時代，有機會綴大人的口音學講台灣話，可惜，無人教咱按怎寫，不過，無人教寫毋代表就無文字，抑無，頂面講的台灣話的來源就無意義。

如頂懸所講，毋管是泉州話抑是漳州話，攏是對中原傳來的。漢朝的揚雄所寫的「方言」這本冊，共漢朝整個國家各地的方言中，意思仝款但是發音無仝的，攏揣出相對應的文字。泉州話起緣較早，雖然是彼時中原各國的混音，但是仝款袂逃出揚雄涵蓋的範圍，也就是講一定有文字；漳州話閣較免講，彼陣中原已經有河洛話這个通用的語言矣，就更加無可能無文字。

不幸的是，千年來一直「語傳」的結果，就是喙講的話佮文字煞脫輪，也就是講真少人有辦法共喙講的話佮對應的文字連起來。因此，看著唐詩，煞袂曉唸出伊對應的台灣話；看著出師表，煞袂曉唸出伊對應的台灣話；看著古典小說，煞袂曉唸出伊對應的台灣話；看著三藏法師翻譯的佛經，也煞袂曉唸出伊對應的台灣話，雖然台灣話對應的字攏佇內底。所以，問題毋是無文字，是無人共古代文獻內的字佮咱講的話連起來，來教咱寫台灣話。

台灣佇這一百年來，才漸漸意識到「文傳」的重要，濟濟的前輩，窮一生的力量，為台灣話的文傳，做掖種子的工課。這馬，咱總算有台灣話對應的標準漢字通用（台灣閩南語常用詞辭典），咱會當寫出家己講的話，也會當「文傳」予後代。這對台灣話的存活佮普及，實在是足重要的。咱絕對毋通閣亂使綴人講：「台灣話無文字啦」！

二、台灣話粗俗

頂一點的說明，予咱知影咱一直無機會，透過「文傳」的方式好好仔學台灣話。逐家攏是綴人講，結果是台灣話內底，一般人接觸口語的機會比文字的機會加較濟。就是按呢，不時會聽著這馬的少年人，開喙合喙，「庶民標籤」就共貼落去。比論，「恁爸」（lín-pē）、「嘐潲」（hau-siâu）、「揬𡳞」（tuh-lān）、「亂濺」（luān-tsuānn）、「孝孤」（hàu-koo）、「創啥潲」（tshòng-siánn-siâu）、「畫虎𡳞」（uē-hóo-lān）等，十花五色，造成一个真䆀的印象：台灣話敢若足「粗魯」。

其實，這種較無文雅的話詞，逐个語言攏有，英語有，國語嘛有，這毋是台灣話特有的。只是定定聽著，閣較少聽著一般較雅致的講法，才會出現這種誤解。土想嘛知，台灣話既然有遮爾悠遠的歷史，絕對毋干焦有遐的「粗俗話」，伊其實是一个真典雅的語言。若了解台灣話，就會知影，伊毋但保留真濟古早味，講起話來嘛誠媠氣，下面咱就來看這兩个特色。

A. 台灣話的古早味：意思是講台灣話內底賰有真濟以前的古早字、古早詞（pinling3347台語文部落格：優雅古典的台語漢字）。下面就舉幾个例予讀者參考，逐个例攏會用華語列出伊的意思佮伊出現的古冊：

1. 冊：tsheh，書《書經．多士：惟爾知，惟殷先人，有「冊」有典》

2. 行：kiânn，走《古詩十九首：「行」行重行行》

3. 卵：nn̄g，蛋《莊子．齊物論：見「卵」而求時夜》

4. 走：tsáu，跑《孟子．梁惠王上：棄甲曳兵而「走」》

5. 泏：tsuat，水溢出《文子．通原篇：原流「泏」泏，沖而不盈》

6. 芳：phang，香《晉書．桓溫傳：既不能流「芳」後世》

7. 奕：ī，下棋《孟子．奕秋：通國之善「奕」者》

8. 枵：iau，餓《正字通：人饑曰「枵」腹》

9. 食：tsia̍h，吃《左傳．昭四年：「食」肉之祿》

10. 凊：tshìn，冷《千字文：臨深履薄，夙興溫「凊」》

11. 茈：tsínn，初生《司馬相如．上林賦：「茈」薑蘘荷》

12. 喙：tshuì，嘴《左傳．昭四年：深目而豭「喙」》

13. 媠：suí，美《列子．楊朱：皆擇稚齒婑「媠」者以盈之》

14. 鼎：tiánn，鍋《儀禮．土冠禮：實于「鼎」》

15. 暝：mî，夜《詩經．風雨：風雨晦「暝」，雞鳴不已》

16. 箸：tī，筷子《荀子．解蔽：借「箸」之事》

17. 嫣：ian，美好《馮延已．三台令：日斜柳暗花「嫣」》

18. 蔫：lian，枯萎《韓偓．春盡日：樹底「蔫」花夜雨霑》

19. 糜：muâi，粥《晉惠帝：何不食肉「糜」？》

20. 曜：iāu，指日、月、金、木、水、火、土星《范寧．谷梁傳序：七「曜」為之盈縮》

21. 蠓：báng，蚊子《列子．莊瑞：蠛「蠓」》

22. 糴：tia̍h，買（米）《蘇軾．糴米：糴米買束薪》

23. 糶：thiò，賣（米）《聶夷中．詠田家：五月糶新谷》

24. 外家：guā-ke，娘家《史記．外戚世家十九：疾「外家」呂氏強》

25. 地動：tē-tāng，地震《後漢書．張衡傳：候風「地動」儀》

26. 青盲：tshinn-mî，瞎子《後漢書．李業傳：皆「青盲」以避世難》

27. 破病：phuà-pēnn，生病《後漢書．虞延傳：有囚於家被病；被病俗做「破病」》

28. 新婦：sin-pū，媳婦《孔雀東南飛：舉言謂「新婦」》　

B. 台灣話的媠氣：意思是講台灣話內底有足濟字形字意誠雅致、表達力誠有力、描述力誠倚意的字詞。伊的字形佮字意誠四配、誠媠氣。下面就舉幾个例予讀者參考，逐个例攏先用華語說明伊的原意，閣用台語解說伊媠氣的所在：

1.　大官：ta-kuann，公公《原意：大官人》－ 尊敬之意較深

2.　大家：ta-ke，婆婆《原意：閫範大家》－ 尊敬之意較重

3.　心適：sim-sik，有趣《原意：心情適意》－ 感受更加倚意

4.　歹勢：pháinn-sè，不好意思《原意：折腰姿勢》－ 字形字意更加倚意

5.　交繃：kau-penn，挑剔《原意：交易緊繃》－ 意象更加倚意

6.　𨑨迌：tshit-thô，遊玩《原意：白天晚上都在活動》－字形字意更加倚意

7.　怨慼：uà-tsheh，怨恨《原意：怨懟戚戚在心》－ 怨懟之心更加倚意

8.　倩人：tshiànn-lâng，雇人《原意：請人做事》－ 字形字意較雅致

9.　真𠢕：tsin-gâu，很棒《原意：能受煎熬之力》－ 字形字意較有力

10.　勞力：lóo-la̍t，謝謝《原意：有勞您費心費力》－ 感謝之心更加倚意

11.　勥跤：khiàng-kha，能幹《原意：強而有力的腳》－ 字形字意較有力

12.　斟酌：tsim-tsiok，細心《原意：仔細衡量》－ 細細思量之意更加倚意

13.　熟似：si̍k-sāi，熟識《原意：似曾相識》－ 涵義較深邃

14.　龜祟：ku-sui，不乾不脆《原意：像龜一樣吞吞吐吐》－ 意象更加倚意

15.　攪擾：kiáu-jiáu，打擾《原意：攪亂之擾》－ 造成不便之意更加倚意

16.　量其約：liōng-kî-iok，大約《原意：大約估量》－ 無需精確之意更加倚意

17.　漲懸價：tiùnn-kuân-kè，拿翹《原意：抬高價格》－ 擺架子之意更加倚意

18.　古老朔古：kóo-ló-sok-kóo，老掉牙《原意：亙古之老》－ 老的形象更加倚意

19.　冤家量債：uan-ke-niû-tsè，吵架《原意：頻翻舊帳》－ 翻舊帳的形象更加倚意

20.　欲死盪幌：beh-sí-tōng-hàinn，累得快死《原意：只剩一口氣在晃著》－累壞了之意更加倚意

21.　無攬無拈：bô-lám-bô-ne，沒有勁頭 《原意：攬不動也拿不來》－毫無精神之意更加倚意

22.　橐個束個：lok-kò-sok-kò，雜七雜八之物《原意：散在盒子或束在一起的東西》－ 散亂之意更加倚意

頂懸干焦舉一寡仔例爾爾，但是應該有夠說服讀者，台灣話真正是一个有古味閣媠氣的語言。只要咱攏會當放棄先入為主的意識形態，放下文人相輕的身段，仝心協力，來大力推捒台灣話的標準漢字，也就是「台語正字」，久來，一定會當慢慢仔感受著台灣話的媠，隨時隨地快樂講出喙、佮意寫入冊。到彼个時陣，毋管是台灣歌曲、台灣童謠、台灣歷史、台灣民間故事、台灣風物，凡是佮台灣有關的物件，攏會當實實在在用台灣話寫、用台灣話讀、用台灣話「文傳」，按呢，對台灣文化的保留佮傳承敢毋是更加有意義咧。

予台語袂佇咱這代斷種的幾項重要工課

***揤遮就會當看著正確無亂碼的文章

退休了後，想講毋通予台語佇咱這代斷種，就予家己第一件工課，就是欲佇三個月內學好台語，包括會曉講輾轉的台語，佮會曉寫台語文章。三個月過去矣，佳哉，無落氣，總算完成了這个心願。這个期間，有發現著一寡重要問題，感覺真有必要敦請教育部較緊來推動一寡重要的工課，上少會當予台語有機會存活，甚至會當予伊閣較普及。

佇咱探討重要的問題進前，咱先來講這三個月來，我的台語學習歷程，一來會當共伊當做欲了解遮的問題的基本智識，二來嘛會當予有心欲學好台語的人做一个參考。這三個月的學習過程是按呢：

1. 學習「臺灣閩南語羅馬字拼音」（簡單叫做台羅拼音）系統，並且用「臺灣閩南語漢字輸入法2.0」做輸入工具，練習佇電腦頂懸拍出正確的台語字。會選用羅馬拼音而無用台語注音輸入法，佮意識形態無關，顛倒是佮我較捷用漢語拼音拍中文而無用注音符號的觀念仝款，主要是考慮著拍字盤頂頭無需要閣加刻其他的符號，只要有上清氣的英文字母就會當拍咱的字，較單純，眼睛嘛較袂予傷小字的外加符號舞甲害了了。

2. 提教育部歷年來台語演講比賽的演講稿做範本（台語演講文章例示：台灣上媠的風景@真平台語網），綴逐篇文章去拍出所有的台語字，這个階段上重要的目的是，透過台羅拼音打字系統，去熟似台語字的七聲八調，這部份同時牽涉著變調的處理，需要較長的時間。

3. 用我家己舊年發表的，有關高教問題的一系列中文文章做基礎，共改寫做台語文章（社論文章例示：假新聞欲走佗位），通訓練用台語寫社論佮科技文章的能力。另外，為著欲凸顯台語佇疊字方面的特色，特別去收集了百外个的「台語疊字詞」。佇這段練習期間，幫忙上濟的兩本字典分別是：「台灣閩南語常用詞辭典」佮「愛台語」

4. 選出十年來總共兩百外首台語歌詞來做實戰，咧專心聽了歌者的演唱，並確定語意了後，根據語意來修改歌詞中錯誤的漢字（台語歌詞更正例示：痴情玫瑰花）。最後閣整理出台語歌詞上捷看著的錯誤漢字兩百外字（台語歌詞錯誤漢字彙整表）。

5. 「海翁台語文學網」提供非常豐富的台語相關資料，遍及台語語言教材、台語文學雜誌/季刊/文庫等，是學習台語的上好所在。真平台語網所分享的海翁雜誌，予我有機會大量閱讀各種台語文章，佇真短的時間內就累積起台語的讀寫功力。

佇這个學習的過程中，我發現著下面幾个問題，佮台語的存活有重大的關係，真值得咱重視，阮也趁這个機會，針對逐个問題，提出政府會當盡速推行的對應工課，通幫贊台語的普及：

1. 部份的台語漢字佇網頁頂無法度正確顯示

上捷看著的亂碼包括：𠢕早（上敖下力，早安)、（左人右因，他們）、山（左足右百，爬山）。遮的字攏是真捷用的，照理講佇咧幫台語選定漢字時，就應該確保會當佇電腦頂頭正確顯示才著。不幸的是，目前佇微軟的視窗系統頂頭，嘛干焦會當靠「新細明體-ExtB」字型才顯示會出來（雖然有時猶會出現一寡奇怪的符號）。教育部有特別說明講「有一寡字」無法度正確顯示，需要家己造字，但是，第一、我無想著講無法度正確顯示的會是遮的遮爾捷用的字，第二、造字毋是一个好方法，因為干焦會當佇家己的系統頂使用，無法度囥佇網路頂通用。這是一個足大的問題，教育部實在有必要盡速共遮的漢字對應著的統一碼（Unicode）界定落來，然後送交「表意文字研究小組（IRG, Ideographic Research Group）」進行編目、審查佮評估，核准了後就會當成做「統一碼聯盟（US, Unicode Consortium）」認可的「中日韓（CJK）」統一表意文字的擴充碼，予伊變成國際通行的內碼，按呢才敢向望台語有存活的可能，甚至有普及的一工。

2. 外來詞欠缺翻譯

有一工，一个同事問我「巧克力」的台語按怎講，我的回答是按呢：這是網路頂的熱門問題之一，答案是「無直接對應的台語漢字」。這是台語發展過程中的一個崩崁悲劇（白色恐怖時期，咱攏干焦會當講國語，政府哪會有心去做外來新名詞的台語翻譯工課）。佇猶無對應的台語漢字進前，這馬上捷看著的省事事省的做法有二：一 、直接採用國語發音的巧克力；二、直接對日文翻譯過來，比如：tsioo-kóo-lè-tòo（其實日文也是對西洋翻譯過去的），但是，這攏毋是久長的做法。我特別去反「台灣閩南語常用詞辭典」，發現佇「索引瀏覽」選項下，列有「附錄」，附錄內包含了「外來詞」一項，頂頭有列出一寡外來詞的台羅拼音，可惜煞無界定出對應的台語漢字。因此，這馬上需要的，其實是教育部趕緊去共這个空補起來，針對欠缺的各種外來詞，界定出對應的台語漢字來，若一時揣無好的對應，直接對外來詞翻譯過來嘛會使，但是就是愛有一个對應的標準台語漢字啦。

3. 台語歌詞亂操操

目前的台語歌詞曲大約會當分做兩類，一類是較傳統的詞曲，一類是新生代的詞曲。頭前的會使提豪記唱片公司出品的唱片做代表，後面的多數是歌唱團體成立的獨立唱片頻道。頭前的保留較濟傳統台語歌曲的曲風，歌詞也多數佇心緒或是感情中轉踅，後面的佇詞曲中加入較濟的變化，歌詞甚至囥入真濟日常生活的描寫。我分析十年來的台語歌曲時，發現毋管佗一類，早期的歌詞，攏因為無範本通參考，作詞大師往往歡喜就好，看著佗一个中文會當提來表達心內台語的意思，就直接提來用，造成甚至仝一間唱片公司的無仝个作詞者的歌詞，攏誠無統一。逐家佇KTV唱歌時，根本無法度判斷看著的歌詞愛按怎唱才著，最後只會當綴著歌者來唱，這是誠無正常、誠無健康的台語亂象。一个負責任的政府，看著這个本來是上好做為全民快速熟似台語標準漢字的KTV歌唱管道，變甲遮爾亂操操時，照講愛較緊想盡辦法，提供補助也好，提供人力的協助也好，予唱片公司一个較好的環境，共出版的台語歌詞，攏遵照著政府提倡的台語漢文標準。只要逐間公司攏按呢做，以後逐家佇KTV唱歌時，就會當看著一致的台語歌詞，慣勢成自然，也就會有能力干焦看歌詞就會當演唱起來，按呢，台語的存活才有機會，台語的普及也才會當向望咧。

台語若是佇咱這代斷種，歷史會講是咱的無能，後代也會講是咱的自私。我這三個月來學習台語的歷程共咱講，只要肯用心、有方法，逐个人攏會當學好台語，咱實在無啥物理由去逃避這个歷史的使命的。