資訊素養簡化做「會曉寫程式」—嚴重的教育錯誤

也是高教深耕計畫引起的話題，真濟學校佇計畫中宣稱欲培養學生的資訊素養，就要求全校各科系的學生攏愛有程式的寫作能力，所講的理由之一是，108學年度規劃給12年國教課綱中新增加了「科技」領域，要求國、高中生必需修習資訊科技、學程式設計，由於該課綱是共「素養做為導向」，因此，會曉寫程式被誤解是「資訊素養」的重要目標。問題是共這个資訊素養簡化做會曉寫程式實在是一个有夠危險、有夠嚴重的錯誤。

首先，咱來界定資訊素養為「對各種資源去收集、統合、評估佮使用資訊的能力」。傳統的通識素養、電腦素養、圖書館素養、媒體素養等等其實攏是建構這个資訊素養的重要因素，其中又以電腦素養上蓋重要，因為佇目前的網路世代，網路已經是一个世界性的圖書館，透過電腦素養來善用這个圖書館，毋但會當大大擴展資訊收集的來源，閣會當借助相關的軟、硬體來有效達到資訊匯集佮資訊使用的需求。

對這个上簡單的界定來看，咱會當真清楚知影有好的資訊素養，就會當予人佇接觸各種資訊時，袂閣毋知欲按怎做，會當愈細膩來分辨出各種資訊的本質、鑑賞各種資訊的特性、以及提煉各種資訊的有效使用方式。這佮文學素養是仝款的，文學素養懸的人，會當真緊分辨、鑑賞佮吸收相關的文學作品。但是，有這个資訊素養的真正目的是啥？不幸的是，整個12年國教課程的設計竟然無講予清楚，顯然是一个大缺失。

若是共人類的能力簡單分做理性佮感性能力，那按呢教育的上大目的顯然就是予人類佇感性佮理性上的能力愈來愈好。感性的部分，比如培養鑑賞美好作品的能力、培養感受各種精神節操的能力等等；理性的部分，上實際的角度就是培養「解題能力 (Problem Solving Capability」，也就是解決問題的能力。解題能力會當簡單界定如下：

1. 有能力看出啥物問題(揣出問題)

2. 有能力分析出問題的起因(揣出問題的起因)

3. 有能力揣出彼的起因的解決方法(揣出解決方案)

4. 有能力應用彼的解決方法去解決問題(有執行解決方案的能力)

欲有頂懸的能力，上重要猶是愛靠領域的專業素養，無充足的專業能力，真歹掠出問題，嘛真歹揣出問題的起因，更加莫講會當提出解決方案、分析方案佮決定欲採取的方案。但是，袂當否認的是，頂懸逐種能力攏會當借助資訊素養的幫忙，比如透過問題或是解決方法的收集、分析與匯合，來增強對問題的了解、增強對解決方案的掌握、甚至增強解題的速度。也就是講，有良好的資訊素養，毋但會當增加解題的速度，嘛會當有足大的機會來提懸解題的品質。因此，若是講，培養資訊素養的目的之一就是用伊來強化解題能力的品質，應該猶算合理。其實我一直認為這才是教育除了感性部分的養成外，上重要的目的。

知影資訊素養佇解題能力上所扮演的角色後，就會當來講為啥物毋好共伊簡化做程式設計的原因。首先，程式設計只是一種解決問題的工具，閣較重要的精神是佇伊背後的解題過程，電腦科學共伊叫做演算法。開發這个演算法的過程就是愛靠頭前咱講的有資訊素養強化的解題能力，程式設計的目的只是共這个演算過程用邏輯形式寫出來，予伊會使佇電腦上執行爾爾。因此，簡單來講，程式設計只是實現這个解題過程的一種作法，安怎設計出這个解題過程才是上重要的。解題過程就是解題能力的展示，無法度設計出解題過程，干焦會曉寫程式是無法度解決啥物實際上的問題的。

有了頂懸的認捌，就會使回頭來看高教所謂培養學生資訊素養的計畫，只是欲予逐个學生會曉寫程式是偌譀古。首先，這是一个無可能的任務。比一个例，咱會使要求全民愛有音樂或是美術素養，通好來提升全民的感性教育程度，但是咱並毋敢要求全民都愛會曉作曲、作詞、配樂、素描、或是畫畫，因為逐个人的天性攏無仝，做這種要求一看就知影是無實際的。閣講，有程式寫作能力，就像學好一種外文仝款，攏只是方便共思想表達出來的專業工具，外文學得好，就會當我口講我想，仝款的，程式寫得好，就會當我手寫我想。既然是專業工具，術業有專攻，就無適合要求人人攏愛會曉，檢采留給專業科系的學生，才是較正確可行的規劃。

既然資訊素養的目標毋是欲共非專業人士攏變成程式設計的高手，那按呢，就應該更加細膩界定伊的目標，才較會當期待伊的成效。下面這个比例，愈好了解：咱無法度嘛無適合共逐个人攏訓練做高級廚師，會當燒得一桌好菜，但是確實真有機會予人人對於做菜的材料、煮食的工具佮煮食的過程攏有真懸的素養，抑就是有真懸的飲食文化素養，會當講得一口好菜。仝款的，若是人人攏會當講得一口好程式，也就是代表有較懸的資訊素養，對資訊材料、資訊相關的處理工具、資訊用佇解題的邏輯過程等，攏有較深的了解。共這个觀念做為資訊素養的培育目標，檢采較具體、較會有成。總講一句，資訊素養應該較注重佇培養人人有較強的解題邏輯，對相關的資訊佮處理工具有相當程度的了解，會當更加自然、更加有能力、更加會遵守法律下，去透過適合的資訊工具，提懸生活上或是專業上解題能力的品質。

對高教的期待是按呢，對國、高中的期待嘛是按呢。所以，直接佇國、高中列入演算法、程式設計、系統軟體、資料處理佮分析做為必修的課程，絕對毋是好規劃，遮的課程只會共學生捒得遠遠遠，共電腦看做是數學、英文以外的一門怪獸。但是若會當用遐的電腦科學知識做素材，重新寫一份符合頂懸講的觀念的資訊素養教材，強調資訊與資訊工具的收集、鑑賞、分析與分辨，更加強調合理合法的邏輯解題過程，檢采會當救救當咧受苦的學生，也會當實實在在培育出國民的優良資訊素養。

高教大痟微學分 學生微成效？

因為高教深耕計畫的關係，最近高教各校上痟的教學理念之一可能是微學分。目前，各校對微學分課程的規劃，多數是2點鐘算0.1學分，也就是開出一堆2點鐘的課程予學生選修，修完一門課程就紀錄0.1學分，因為這是無齊頭學分的課程，因此叫做「微學分課程」。為著配合教育部推動用學院做為教學主體的迒領域的「主題」式教育需求，遮的微學分課程往往會歸類到無仝的主題，學生會使按照主題，共家己有興趣的微學分匯集，做成齊頭的學分。因為2點鐘做一个單位的微學分課程真歹規劃成效評估，因此，有一寡學校閣會加入「修習到1.6學分後，若會當舉辦成果展覽做成效驗收，會另外得到0.4學分而變做2.0的齊頭學分」的規定。也就是講，那个成果展覽的分量真重，相當於四門微學分的課程。

本來，教育部只是提頭想欲用學院做為單位來設計主題式的講座，佇理論少、動手濟，快樂學習的宗旨下，予學院的專業佮特色較大眾化，提供學生自主學習的管道佮培養迒領域的能力，這共微學分一點關係嘛無，卻予真濟學校佇某乜私校提議微學分的理念下，攑香綴咧拜，借微學分課程來實現。問題是檢采是為著便宜行事，或者是為著高教深耕計畫的業績，卻定定有學校假用微學分的名義，做奉送學生學分的代誌。比如，由學院規劃幾個主題，分別開出18門微學分課程，逐門微學分課程請一个專家來演講，學生若聽2點鐘的演講，就算0.1學分，檢驗成效部分，有一寡學校要求交聽演講的心得報告，有仔攏免。這佮一般演講講座有啥物差別？哪閣需要創一个微學分課程出來？

佳哉，目前各校開出上濟的微學分課程，主要猶是下佇通識或是專業的通識化部份，學習成效猶算較好掌握，若是共這个微學分的觀念直接囥落去專業課程的規劃頂頭(猶是有一寡學校咧按呢做)，可能就誠危險。想像一下：提一門標準課程的18分之1做一門微學分課程，意思就是共逐門標準課程攏分割做18門微學分課程，對迒領域的角度允准學生佇三門標準課程分割出來，總共54門微學分課程內底，隨意組合修習，這時若無加上「適當的規範」，最後往往是抾各標準課程前面上簡單的6門微學分課程來組合做一門標準課程，結果確實是有迒領域，但卻無一个領域有法度深入，也就是所謂的逐項捌、無一項絕，實在是無法度講有啥物專業的學習效果。加上適當規範的意思，就是愛有指導性佮限制性，指導性會當用主題來規範，限制性可能需要用程度來規劃，若按呢佮模組或是學程的設計毋啥差別，又何乜苦共課程分割做遮爾細的微學分。

簡單來講，用0.1學分做基礎的微學分課程理論，毋是萬能丹，袂當想欲一帖藥治萬項病，需要看領域的屬性做非常細膩的規劃，若無好空得無著、歹空直直來，這佇專業領域頂頭更加危險，這檢采就是是按怎幾个龍頭學校親像無蓋有興趣的原因。比如台大的類似規劃，干焦有0.5學分的設計。微學分的概念看起來真有創意，但是欲有成效，毋是遐簡單，若是最後演變做用演講來抵學分數，來抵深耕計畫的業績，就是學習的大災難囉。

我詳細參考國外的資料，發覺佮微學分較有關係的觀念有兩个：

「迷你課程(Mini-courses)」佮「部份學分(Fractional credit hours)」，頭前講的是逐門迷你課程上課3禮拜以上、半學期以下，賦予1抑2的學分；後爿講的是共一門標準課程按照相關性質分做數部份，並且個別訂定修習的時間數，完成一部份的修習後，就得到「已修習時間數/規定總修習時間數*學分數」所計算出來的學分，學分無一定會齊頭，所以叫做部份學分。這兩个觀念差不多，只是計算角度無仝，攏是共修課的彈性還予學生，只要上完教師設定的部份，就會當提著對應的學分，無需要愛規學期修完才會當提著學分。這款設計共專業課程自動下佇迷你課程內面，專業能力的修習有彈性閣較合理，而且佮畢業應修學分也無違背，因為只要共所有修習的學分加起來滿足應修的總學分就會使，檢采是較值得推廣的做法。

下面是我為科大這群透過實作來精煉智識的大學生，按照部份學分的理論，所提出的課程規劃，其實這个方法我已經做真久矣，只差佇一直無法規會當授予部份學分，以後檢采就問題囉。通常我會共一門專業課程分割做3門迷你課程(程度搭配部份學分漸漸加深)：

迷你課程一：體驗課程+測試，3~6禮拜，測試通過得(3~6)/18*3=0.5~1學分。

迷你課程二：基礎課程+測試，6~12禮拜，測試通過得(6~12)/18*3=1~2學分。

迷你課程三：深入課程+測試，3~6禮拜，測試通過得(3~6)/18*3=0.5~1學分。

逐个迷你課程攏是一個階段的完成，因此，學甲佗位就會使停甲佗位，就會當提著對應的學分。迷你課程間有次序性，也就是，需要學完頭前階段才會當修習後爿階段，不過，只要頭前階段完成，啥物時陣攏會當轉來繼續修習下階段課程。若講著迷你課程修習時間數的訂定，這就愛看課程的性質，比如程式設計課程所分割出來的三門迷你課程，我會予逐門6禮拜、1學分的仝款重量。我過去的經驗共咱講，這个方法佇學習上毋但有效果，嘛袂造成修習的困擾，有部份學分觀念的法規支持後，應該會像猛虎添翼，有興趣的學校，檢采會當試看覓？

順紲講一下：阮絕對無共演講這个學習管道看無上目，因為一个好的演講者，往往會當佇真短的時間內共伊一生的功力攏灌予聽眾，聽眾除了聽甲真愉快以外，有時也會予伊感動到甲共伊當做一生的志向。因此，聽演講絕對是非常重要的：通俗的演講會當予人開闊視野，阿若專業的演講就會當引起深入探討的興趣。因此，一場好的演講，絕對有資格當做一門微學分課程，問題是學生有法度對彼門微學分課程學著0.1學分的實力無？欲對一門專業級演講得著專業級的學習成效，聽眾也愛是專業等級才會使，這就毋是全部攏用微學分的設計做會到的。