因為高教深耕計畫的關係，最近高教各校上痟的教學理念之一可能是微學分。目前，各校對微學分課程的規劃，多數是2點鐘算0.1學分，也就是開出一堆2點鐘的課程予學生選修，修完一門課程就紀錄0.1學分，因為這是無齊頭學分的課程，因此叫做「微學分課程」。為著配合教育部推動用學院做為教學主體的迒領域的「主題」式教育需求，遮的微學分課程往往會歸類到無仝的主題，學生會使按照主題，共家己有興趣的微學分匯集，做成齊頭的學分。因為2點鐘做一个單位的微學分課程真歹規劃成效評估，因此，有一寡學校閣會加入「修習到1.6學分後，若會當舉辦成果展覽做成效驗收，會另外得到0.4學分而變做2.0的齊頭學分」的規定。也就是講，那个成果展覽的分量真重，相當於四門微學分的課程。
本來，教育部只是提頭想欲用學院做為單位來設計主題式的講座，佇理論少、動手濟，快樂學習的宗旨下，予學院的專業佮特色較大眾化，提供學生自主學習的管道佮培養迒領域的能力，這共微學分一點關係嘛無，卻予真濟學校佇某乜私校提議微學分的理念下，攑香綴咧拜，借微學分課程來實現。問題是檢采是為著便宜行事，或者是為著高教深耕計畫的業績，卻定定有學校假用微學分的名義，做奉送學生學分的代誌。比如，由學院規劃幾個主題，分別開出18門微學分課程，逐門微學分課程請一个專家來演講，學生若聽2點鐘的演講，就算0.1學分，檢驗成效部分，有一寡學校要求交聽演講的心得報告，有仔攏免。這佮一般演講講座有啥物差別？哪閣需要創一个微學分課程出來？
佳哉，目前各校開出上濟的微學分課程，主要猶是下佇通識或是專業的通識化部份，學習成效猶算較好掌握，若是共這个微學分的觀念直接囥落去專業課程的規劃頂頭(猶是有一寡學校咧按呢做)，可能就誠危險。想像一下：提一門標準課程的18分之1做一門微學分課程，意思就是共逐門標準課程攏分割做18門微學分課程，對迒領域的角度允准學生佇三門標準課程分割出來，總共54門微學分課程內底，隨意組合修習，這時若無加上「適當的規範」，最後往往是抾各標準課程前面上簡單的6門微學分課程來組合做一門標準課程，結果確實是有迒領域，但卻無一个領域有法度深入，也就是所謂的逐項捌、無一項絕，實在是無法度講有啥物專業的學習效果。加上適當規範的意思，就是愛有指導性佮限制性，指導性會當用主題來規範，限制性可能需要用程度來規劃，若按呢佮模組或是學程的設計毋啥差別，又何乜苦共課程分割做遮爾細的微學分。
簡單來講，用0.1學分做基礎的微學分課程理論，毋是萬能丹，袂當想欲一帖藥治萬項病，需要看領域的屬性做非常細膩的規劃，若無好空得無著、歹空直直來，這佇專業領域頂頭更加危險，這檢采就是是按怎幾个龍頭學校親像無蓋有興趣的原因。比如台大的類似規劃，干焦有0.5學分的設計。微學分的概念看起來真有創意，但是欲有成效，毋是遐簡單，若是最後演變做用演講來抵學分數，來抵深耕計畫的業績，就是學習的大災難囉。
我詳細參考國外的資料，發覺佮微學分較有關係的觀念有兩个：
「迷你課程(Mini-courses)」佮「部份學分(Fractional credit hours)」，頭前講的是逐門迷你課程上課3禮拜以上、半學期以下，賦予1抑2的學分；後爿講的是共一門標準課程按照相關性質分做數部份，並且個別訂定修習的時間數，完成一部份的修習後，就得到「已修習時間數/規定總修習時間數*學分數」所計算出來的學分，學分無一定會齊頭，所以叫做部份學分。這兩个觀念差不多，只是計算角度無仝，攏是共修課的彈性還予學生，只要上完教師設定的部份，就會當提著對應的學分，無需要愛規學期修完才會當提著學分。這款設計共專業課程自動下佇迷你課程內面，專業能力的修習有彈性閣較合理，而且佮畢業應修學分也無違背，因為只要共所有修習的學分加起來滿足應修的總學分就會使，檢采是較值得推廣的做法。
下面是我為科大這群透過實作來精煉智識的大學生，按照部份學分的理論，所提出的課程規劃，其實這个方法我已經做真久矣，只差佇一直無法規會當授予部份學分，以後檢采就問題囉。通常我會共一門專業課程分割做3門迷你課程(程度搭配部份學分漸漸加深)：
迷你課程一：體驗課程+測試，3~6禮拜，測試通過得(3~6)/18*3=0.5~1學分。
迷你課程二：基礎課程+測試，6~12禮拜，測試通過得(6~12)/18*3=1~2學分。
迷你課程三：深入課程+測試，3~6禮拜，測試通過得(3~6)/18*3=0.5~1學分。
逐个迷你課程攏是一個階段的完成，因此，學甲佗位就會使停甲佗位，就會當提著對應的學分。迷你課程間有次序性，也就是，需要學完頭前階段才會當修習後爿階段，不過，只要頭前階段完成，啥物時陣攏會當轉來繼續修習下階段課程。若講著迷你課程修習時間數的訂定，這就愛看課程的性質，比如程式設計課程所分割出來的三門迷你課程，我會予逐門6禮拜、1學分的仝款重量。我過去的經驗共咱講，這个方法佇學習上毋但有效果，嘛袂造成修習的困擾，有部份學分觀念的法規支持後，應該會像猛虎添翼，有興趣的學校，檢采會當試看覓？
順紲講一下：阮絕對無共演講這个學習管道看無上目，因為一个好的演講者，往往會當佇真短的時間內共伊一生的功力攏灌予聽眾，聽眾除了聽甲真愉快以外，有時也會予伊感動到甲共伊當做一生的志向。因此，聽演講絕對是非常重要的：通俗的演講會當予人開闊視野，阿若專業的演講就會當引起深入探討的興趣。因此，一場好的演講，絕對有資格當做一門微學分課程，問題是學生有法度對彼門微學分課程學著0.1學分的實力無？欲對一門專業級演講得著專業級的學習成效，聽眾也愛是專業等級才會使，這就毋是全部攏用微學分的設計做會到的。
沒有留言:
張貼留言