最近幾冬，技職教育體系上痟的熱門科系，若講是電競，大概袂有人會否認。你無看見，毋管是公立抑私立的高職，攏四界咧走揣資源，通好新設或者是改名電競科；科大彼爿嘛是，相爭咧設立電競比賽場所，並且大力宣傳，做為吸引高職學生的重要設備。
這種燒熱，予人回想起著早期餐飲系當興的時陣，彼當時，高職、科大嘛是相爭咧設立餐飲系，因為學生的來源濟甲泛濫。雖然真濟高明人士一直咧大聲呼籲，愛小可踏擋咧，甚至幾若改提出，就業市場上低薪的頭路，就落在餐飲界的統計資料做證明；教育部嘛定定咧警告，餐飲的就業市場已經飽滿，可惜猶是毋啥效果。
這馬餐飲涼落來矣，想袂到卻出來一个電競，閣共技職教育體系創甲熱滾滾，這个現象佮彼時的餐飲有啥差別？實在是真值得來詳細分析。
這波的電競狂熱的源頭來自電競產業，因此，有必要先講清楚電競產業，才會當來評論這个積極設立電競科系的現象。首先，電競（電子競技，e-Sports）講的是使用數位遊戲軟體，透過網路對戰，來進行競技的比賽。近幾年來，台灣電競選手佇 「英雄聯盟」、「傳說對決」、「拳皇14」、「爐石戰記」等電競大賽陸續奪著突出的成績後，電競狂熱就開始衝起來。當這个競技比賽升級到職業層次的時陣，電競產業就按呢產生囉，佮職業運動項目的棒球、網球、籃球、賽車等的產業仝款。一个成熟的職業運動產業多數會包括：
1. 職業運動聯盟（比如中華職棒大聯盟）安排賽事；
2. 職業運動球隊（比如富邦悍將）招募球員；
3. 職業運動球員（比如陳金鋒）佮中人；
4. 媒體（比如FOX體育台）負責轉播賽事；
5. 賽事（比如職棒賽程）；
6. 周邊商品（比如限量紀念球員T）。
電競產業當然無例外，嘛包含下面的部份：
1. 職業電競聯盟（比如台灣電競聯盟）；
2. 職業電競隊伍（比如閃電狼）；
3. 職業電競選手佮中人；
4. 媒體（比如Yahoo奇摩電競直播平台）；
5. 賽事；
6. 衍生商品。
頂面這个對照，是欲予咱會當較緊掠著電競產業的基本面像。不過，佮傳統職業運動產業比起來，電競產業猶是有一寡特殊的所在：
一、職業電競選手是利用電子設備做伊的運動器械進行競賽的，因此，比賽的介面是電競硬體，比如電競電腦，操作的對象是某乜款遊戲軟體，並透過網路進行比賽。因此，比賽場所的設置，佮一般認捌的職業球賽真無仝。
二、遊戲軟體主導了比賽的內容，參與比賽的職業選手，攏是彼个特定遊戲軟體的高手。若是有一工彼个遊戲退燒矣，無閣做為競賽軟體，遐的相關的電競選手，就愛進行迒項目的訓練，也就是轉換跑道，一般來講，這是真無簡單做會到的。
三、電競的特殊性，予電競選手毋但一工需要開十二到十四點鐘咧練習，更加重要的是，智力和情緒都愛有夠好，才會當佇遐爾複雜的戰略內，透過團隊的合作活落來，也才會當變成一个職業選手。這種短時間內燃燒青春的工課，生命週期真歹長久，因此，過了25歲，可能就算長壽選手了，這佮職棒球員甚至過了35歲，猶有拍拚的本錢是大大無仝的。
三、電競產業建築佇兩个基礎產業頂頭：硬體佮遊戲軟體，這也較特別。硬體部份需要真高階的電腦，這部份台灣算是真強的，尤其佇電競筆電縱橫市場幾若冬的微星公司，更加是排佇頭名。軟體部分需要倚靠創新的遊戲設計理念，對早期的釘孤枝遊戲，到這馬流行的濟人線上競技場（MOBA ，Multiplayer Online Battle Arena），這部份台灣猶是較弱勢，致甲本土廠商定定放棄家己研發，改做代理海外的產品。
寫到遮，咱會當共電競產業界定甲較清楚咧：除了親像傳統職業運動產業的相關部份外，電競產業猶閣包含硬體與遊戲軟體兩个基礎產業。紲落來，對教育的角度來看覓，咱高教會當配合電競產業的佗幾部份：
1. 聯盟、隊伍、中人 => 傳播系、管理系
2. 媒體、主播 => 傳播系
3. 賽事場所、衍生商品 => 設計系
4. 硬體 => 電機系、電子系、通訊系
5. 軟體 => 資訊系（負責程式設計）、設計系（負責多媒體設計）、數位遊戲設計系（負責遊戲設計）
6. 電競選手 => ?
看起來，多數部份攏有對應的科系會當來培養人才，只有電競選手無對應，按呢，問題就清楚囉：咱愛專門設一个電競系來培養電競人才無？咱先來看國家的政策：
電競產業的來源是韓國的數位遊戲產業，因此，韓國佇電競產業逐个部份的佈局攏上完整。佇韓國、中國相連紲共電競產業列入運動產業後，2017年台灣也修正《運動產業發展條例》部份條文，共電競列入運動產業。電競選手會當比照籃球、網球選手，得著國家的輔導、融資補貼，會當看出政府的積極佮用心。雖然，世界其他國家多數猶無遮爾積極，比如美國目前對電競並無特別界定，猶是共歸類佇科技、遊戲，毋是運動。
立法院2018年3月R00369《有關發展我國電子競技產業之研析》一文，特別提著目前台灣電競產業的困境：
1. 社會觀感無好
2. 企業投入無夠
3. 軟體開發實力欠缺
4. 選手生涯保障不足
這攏是事實，尤其企業投入無夠、職業選手生涯保障不足兩項，一直是台灣各種職業運動產業的病疼，電競產業真歹無仝。彼篇文章點出，電競目前猶無適合納入學校的體育課程，建議高中職以下的學校，推廣電競時愛較細膩，猶是專注佇大專佮成人電競選手的培養較穩當。換一句話講，電競選手的培養，無適合囥佇高職部份，目前高職咧痟電競科的現象，其實毋是政府意愛的。高教，尤其科大部份，就閣轉來拄才的問題：咱愛專門設一个電競系來培養電競人才無？
首先，咱來觀察職業運動員的養成管道，這部份美國上出名：職業運動產業旺盛，職業運動員上強。但是，美國並無專門的體育大學，所有的體育名校，攏是一般大學；也無為著專門培養棒球員、籃球員、賽車手去設立的科系。但是，這並毋是講，美國大學無重視體育，拄好倒反，美國大學真敢下重本去建設體育資源，對體育天分懸的學生，嘛全力栽培，不過，有一个條件，就是要求學生仔的學習成績愛達到一个水準，才會使參加校隊、參加比賽。按呢的教育規劃，就是欲確保大學畢業後，學生若無法度順利變成一个職業運動員時，猶會當靠專業能力趁食。
順著這个邏輯，專門設立一个電競系來培養電競選手，其實誠冒險。第一、課程規劃上，敢只要有一个豪華个比賽場所，予學生規工咧練習就會使？第二、遊戲軟體無仝，電競選手的技能就無仝，遊戲軟體的生命週期又閣無法度確實預測，欲按怎去選購上適合選手的遊戲軟體？第三、若是閣愛顧著學生未來無法度順利成為職業電競選手時，猶會當趁食，按呢除了電競技能外，愛閣加入啥物的專業智識，師資欲閣按怎安排？遮的疑問，攏牽涉著單獨設立一个電競系，佇師資、課程、設備等等方面的困擾，當遮攏無法度有效規劃佮掌控時，電競系的設立佇實務上是誠有風險的。
若是交予數位遊戲相關科系來培養電競選手又閣按怎？參考北部某乜科大的「多媒體與遊戲發展科學系」、「數位遊戲設計系」的課程，或者是南部某乜科大的「多媒體與電腦娛樂科學系」的課程，規劃有「程式設計」、「多媒體設計」佮「遊戲企劃（設計）」三个模組，就是講猶是用電競產業的遊戲軟體部份做專業智識的核心。只是學生欲修完所有三个模組無蓋簡單，最後猶是會選定一个模組做專業。只學一个模組，欲佮其他的相關科系，比如資訊、設計等競爭，就無一定會較贏囉。我認為這个科系上特殊的專業智識應該是遊戲企劃，這部份牽涉著真濟領域，比如遊戲設計理論、文學、歷史學、心理學、神話學、軍事學等。好好仔共這部份的課程規劃好，才是學生未來競爭的上大本錢。既然目前的數位遊戲相關科系的教育目標，囥佇培養電競產業的軟體人才，欲叫遐的系轉型來培養電競選手其實有點仔為難，畢竟入來的學生背景無仝款、課程規劃無仝款、師資無仝款、設備更加無仝款。
其實，電競選手有一項實務智識，毋是死讀冊就會當學著的，彼就是遊戲軟體的經驗指數，就親像一个圍棋高手所擁有的圍棋經驗指數仝款。這是一个非常重要又閣難得的經驗智識，除了會當提來驗證遊戲設計理論的好䆀以外，佇改良遊戲或者是設計新遊戲時，攏真有助益，這才是電競選手的資產。換一句話講，遊戲設計時，若會當共電競選手的實務經驗納入，將是上好的設計組合。因此，一个較實務的策略，就是共電競融入遊戲設計系的遊戲企劃模組，若按呢，遊戲企劃佇電競實務的相楗下，設計出來的遊戲就更加有競爭力，閣會當確保學生畢業了後，若是無法度順利變成職業電競選手，或者是原來的遊戲軟體失勢時，猶有存活的本錢。
共電競做為一个學程也是一種做法，因為學程是加修的物件，屬於第二專長。這个學程內，愛會記得共電腦硬體、資訊、多媒體設計、遊戲設計理論等等的基礎智識囥入來，有遮的智識做底蒂，閣有實際的電競經驗做幫贊，等於加了別人無法度一時間就學會起來的額外專長。
最後，共電競列入課外活動，也是會使考慮的做法，比如成立電競社團或者是電競校隊攏真好，尤其組織校隊，會當為校爭光，學校的支援會愈大方。遮的課外規劃，會當予無仝科系的學生，佇團體內相激頭腦，不只對團隊精神的培養與群體戰略的修行（這攏是電競團隊的核心價值）有幫贊，也袂影響學生原來的專業學養，又閣會當透過對外或者是校際比賽，來實際訓練電競技能，真是一兼二顧，摸蜊仔兼洗褲。這个課外規劃佮美國式的教育規劃上接近，對電競選手的培養應該有真好的成效，值得試看覓。
最後，猶是著提醒徛佇電競風潮中的高職佮科大，佇看完這篇文章後，會當對著共電競融入學校原來組織的方向思考，細膩去規劃，來達到袂傷害學生專業智識的養成，又閣會當共有天份的學生，成功訓練做電競選手，若按呢，就是電競產業的幸運、電競學生的幸運、高職教育的幸運、以及高教的幸運。
沒有留言:
張貼留言